Season bul ṭan ṭha lo tak a hmachhawn mek karah, Manchester United goalkeeper Senne Lammens chuan club leh amah ngei pawhin dinhmun ṭha zawk an thlen leh theih nan Carrington training ground-ah hun tam zawk hmangin ṭan a la nasa hle.

Belgium shot-stopper hi season liam ta khan player lakluh zingah a langsar pawl leh entawn tlaktling tak a ni a, United tlarhnung venhimna kawngah thla a ti-muang hle ṭhin a ni. Mahse, tun season ṭan aṭang khan Old Trafford-ah fiahna bumboh tak hmachhawn zui zelin, Inrinni leh Pathianni inkhelah khan a che zui lo hle a ni.

Old Trafford-a Aston Villa an mikhualna match-ah second 60 lek a liam tihin, Alysson-a ball pet chu Lammens-a bawp inkarah a zut lut a, Villa-in hma an hruai nghal a. Hemi hnu minute 4 pawh tling lovah Nicolas Jackson-a ball pet chu a lo dang per leh hlauh mai a, hei hi Villa tan goal pahnihna atan awlsam takin an chantir zui leh ta a ni.

A form tlakhniam dan hi Lammens hian a fiah hle a, Mail thuchhuah danin, training chawlh nia a chawl tur pawh ṭhulhin mimal training a nei zui ziah niin an tarlang. Carrington-ah tuk tin rawn thleng hmasa ber a ni ziah a, haw tlai ber a ni zui ṭhin bawk.

United chhungrila hotu ṭhenkhat chuan a season hmasaber ai khan a khelh dan phungah hmasawnna a nei zawk nia an hriat thu an sawi a ni. Tun season Premier League-ah Lammens hi a zawnin shot 52 lai a hmachhawn tawh a, hei hi league-a goalkeeper dangte nen a tam ber pawl a ni. Save nei hnem lamah palina ni mek mah se, United hian league match 10 an khelh tawhah goal 19 ngawt an chhuah tawh a, Ipswich leh Crystal Palace te chiah goal chhuah hnem zawh an awm a ni.

United legend Roy Keane chuan Sky Sports-a a sawinaah Lammens chu hma a sawn takzet a ngai a ni tiin a sawi. Keane chuan, "Season liam taa an chet ṭhat pui lai khan, goalkeeper kha a che ṭha em em a, save lian tak tak a nei ṭhin, mahse tunah chuan chutiang a ti ta lo. Bruno Fernandes pawh a vanglai angin a che ṭha tawk lo bawk. Goalkeeper hi a chet ṭhat lehzual a ngai a ni. Goalkeeper-in ball a dang thei lo a nih chuan team tan a thil lawmawm lo tak a ni a. Bottom three-a awm chunga Manchester United tana khelh si hi chu an natsak ngawih ngawih tur a ni," tiin a sawi.

Spain-in World Cup-a Belgium an thawi chhuah ṭum pawha tihsual lo nei tawh Lammens hi sawiselna nasa tak hmangin zirchian a ni chho mek a, mahse a rimtak leh tumruh taka a hnathawh dan erawh sawisel rual a ni lo.