Tun kar hian Manchester United head coach Michael Carrick-a hmakhua tur chungchangah thutlukna siam dawn ni mah se, Thawhlehni zing khan kum 45 mi hi Carrington-ah pangngai takin training hmunah a inlan chhunzawm zel a ni. Hemi chhung hian an club hotute chu a hmakhua rel tura inbiakna pawimawh nei turin Monaco panin an thlawk chhuak mek thung.

United thuneitute chuan Carrick-a hmakhua chungchangah hian thutlukna hnuhnung ber an la siam lo tih sawi mah se, chief executive Omar Berrada leh director of football Jason Wilcox te chuan manager hi ban mai ṭhain an hria a, banna thu hi thlen an rilruk nia hriat a ni. Berrada leh Wilcox te hian Nilaini hian Monaco-ah co-owner Sir Jim Ratcliffe leh Glazer chhungkuate nen board meeting an nei dawn a, hetah hian Carrick-a hmakhua hi sawi ho a ni dawn a ni.

Kar hnih liam taa Como leh Bournemouth an hneh loh hnu khan Carrick-a hnenah hian match thum chhungin team dinhmun siamṭha tura hun pek a ni a. International break inṭan tirh hi Berrada leh Wilcox te chuan heng match thum chhunga hmasawnna a awm leh awm loh endik nan an hmang a ni.

Heng match thum an khelh chhung hian United hian vawikhat chak, vawikhat inhnehtawk leh vawikhat tlawm an chhinchhiah a, goal riat ngawt an chhuah avangin an inkhelh dan hi a phili takzet a ni. A bikin Old Trafford-a Roma leh Aston Villa an hmachhawn ṭum khan inkhel a ropuiin a thlabar-awm hle. Roma laka 2-0 a an hnufual hnuah minute sarih hnuhnung chhunga goal hnih khungin 3-2 in an lehlopui a; Villa lakah pawh 2-0 leh 4-2 a an hnufual hnuah, injury time-a Joshua Zirkzee leh Patrick Dorgu te goal khung hmangin 4-4 in an inhnehtawk thei hram a ni.

Berrada leh Wilcox te chuan manager thlak a hun tawh hlein an hria a, mahse he thutlukna hi Ratcliffe leh Glazer chhungkuaten an nemnghet phawt a ngai dawn a, hei hi tun kar chhung hian a thleng maithei a ni. Manager chhuak mai tura ngaih ni mah se, Thawhlehni zing dar 7:15 khan Carrick hi training kit inbelin Carrington-ah a rawn thleng a ni.

International duty vangin first-team player tam zawk an awm loh avangin, Carrick leh a staff te chuan Under-21 academy player ṭhenkhat ko chhoin training hi an neihpui a ni. United hotute chuan Carrick-a thlaktu tur pawh an hel mek a, World Cup hnua contract thar ziaktu USA boss Mauricio Pochettino chu thlan ber atan an ngai a, a contract-ah chhuah theihna clause a tel a ni. Hemi bakah hian hna nei lo mek Eddie Howe leh Julian Nagelsmann te pawh lakluh theih zinga mi angin an ngaihven bawk a ni.