Aston Villa laka match tawp lamah beiseina rawn incho tho lehin rawn inlumlet ve bawk mah se, hei hi Manchester United manager Michael Carrick-a tana a hna chelh zui zel nana a tawk a nih hmel loh.

United hotu INEOS chuan club midfielder hlui Carrick-a hnenah hian match pathum chhungin team boruak tiṭha a, dinhmun puitling zawk a thlenpui theih nan hun tiam an lo pe tawh a ni. Hemi chhung hian Red Devils hian hmasawnna leh beiseina lantir ṭhin mah se, match pathum aṭang hian ṭum khat chiah hnehna an chang thei thung a ni.

Carrick-a hmabak a thim chhoh mek lai hian, INEOS-in a thlaktu atana an duh ber leh ngaihven ber coach Eddie Howe chuan Premier League club Crystal Palace dawrna chu a lo hnawl ta hlauh mai.

Newcastle United manager hlui Howe hi Crystal Palace chuan an manager thar atan lakluh tumin dawrna thlen mah se, he London club pan hi a tum loh thu a tichiang hle a ni. Hei hian Old Trafford pan theihna kawng a hawn zau zual tir nia ngaih a ni.

INEOS lam hian Carrick-a thlak tur hian ruahmanna an siam mek nia report a ni a, team enkawl thiam leh tawn hriat ngah tak manager thar ruat thuai an tum a ni.