Manchester United chuan head coach Michael Carrick chu an ban thuai dawn niin The Athletic chuan a tarlang a, a thlaktu tur zingah World Cup-a che ṭha tak USA manager Mauricio Pochettino chu duh berte zinga mi a ni mek a ni.
Old Trafford-ah hian Michael Carrick-a dinhmun a derthawng takzet a, Pathiannia Aston Villa nen 4-4 a an inhnehtawk hnu khan hotute chuan ban mai an rilruk ta a ni. The Athletic chanchinbu-a David Ornstein, Adam Crafton leh Laurie Whitwell-te tarlan danin, Red Devils hian Carrick hi manager hna aṭangin chawlhtir (sack) an tum hnai hle.
Carrick-a'n Old Trafford-a mawhphurhna a lak aṭangin thla kua (9) chauh a la liam a, mahse tun season-a an chet chhiat em avangin United hotute lakah rinhlelh a hlawh chho hle a ni. United director of football Jason Wilcox chuan head coach hi endikna (review) a neihpui mek a, a bikin Chelsea, Roma leh Aston Villa te nen an inkhelh hnua an dinhmun hi thliah thluh nan an hmang a ni.
He boruak thleng mek karah hian manager thar tur zawn hna kalpui nghal a ni a, US national team enkawltu Mauricio Pochettino chu Carrick-a thlaktu atan an duh ber a rawn ni chho ta hlauh mai. Tottenham leh PSG boss pawh lo ni tawh Pochettino hi kumin nipui World Cup inelnaa US team a hruai ṭhat em avangin fak a hlawh hle a, United board pawhin an ngaihven zui hle a ni.
United tan tun season hi season harsa tak a ni a, khelmual chhunga an zia a hniam tual tual bawk nen hmasawnna hmuh tur a awm lo hle. Aston Villa nena 4-4 a an inhnehtawk hnu phei khan fan-te leh hotu-te an lungawi lo kher mai. Carrick-a hnuaiah game thununna a awm tawk lo tih leh tlarhnung lamah buaina lian tak an nei tih he match hian a tilang chiang hle a ni.
Old Trafford-ah manager inthlak ngun lutuk hi buaina lian tak a ni chhunzawm zel a, Carrick pawh hian hun rei a hmang thei dawn ta lo a ang hle. Jason Wilcox-a kaihhruai review zawh a nih veleh thuchhuah nemnghet siam a nih beisei a ni a. Pochettino bakah manager dang engemaw zat pawh an target list-ah an awm nia sawi a ni bawk.
Pochettino hian Premier League-ah Southampton leh Tottenham Hotspur te lo enkawl tawhin tawn hriat ṭha tak a nei a, Spurs chu Champions League final thlengin a lo hruai tawh a nih kha. Premier League-a inkhelh dan leh boruak a hriat chian em avangin Manchester United hian an squad naupang takte kaihruai a, team din thar leh tur atan mi ṭha bera an ngai a ni.
Carrick-a ban a nih chian hun leh a thlaktu tur ruat a nih dan hi ni tlemte chhungin a chiang chho tawh beisei a ni a, Manchester United ṭantute pawhin Old Trafford-a inthlakthlengna lian tak thleng tur hi nghahhlelhawm ti takin an thlir mek a ni.
